លោក សាមុត សុធារិទ្ធ អភិបាលរងខេត្តព្រះសីហនុ អញ្ជើញចូលរួមក្នុងពិធីបេីកសសម្ពោធ សណ្ឋាគារត្រាយម៉ូលា(Trimulia Hotel) ក្រុងព្រះសីហនុ.
(ខេត្តព្រះសីហនុ)៖ នាព្រឹកថ្ងៃទី២៨ ខែកញ្ញា ឆ្នាំ២០២៥ នេះ លោក សាមុត សុធារិទ្ធ អភិបាលរងខេត្តព្រះសីហនុ តំណាងដ៏ខ្ពង់ខ្ពស់ឯកឧត្តម ម៉ាង ស៊ីណេត អភិបាលខេត្ត បានអញ្ជើញជាអធិបតីក្នុងពិធីបើកសម្ពោធដាក់ឱ្យប្រើប្រាស់សាកល្បងសណ្ឋាគារ ត្រាយម៉ូលា របស់ក្រុមហ៊ុន ហ្គោលដេន អូអេស៊ីស អេនធើធេនម៉ិន (GOLDEN OASIS ENTERTAINMENT) ស្ថិតនៅភូមិ២ សង្កាត់២ ក្រុងព្រះសីហនុ ដោយមានការអញ្ជើញចូលរូមពីឯកឧត្តម លោកឧត្តមសេនីយ៍ នាយករដ្ឋបាល លោកអភិបាលក្រុង ប្រធាន/អនុប្រធានមន្ទីរ-អង្គភាព និងលោក ឈួង វ័ងវ៉ (CHHONG HWANG WEI)នាយកប្រតិបត្តិ នៃក្រុមហ៊ុន ត្រាយម៉ូលា គ្រុប (TRIMULIA GROUP)។
ឆ្លៀតក្នុងឱកាសនោះ លោក សាមុត សុធារិទ្ធ បានសម្តែងនូវការស្វាគមន៍យ៉ាងកក់ក្ដៅនិងចូលរួមអបអរសាទរចំពោះពិធីសម្ពោធដាក់ឱ្យប្រើប្រាស់សាកល្បងនូវសណ្ឋាគារ ត្រាយម៉ូលា នៅលើទឹកដីតំបន់ឆ្នេរដ៏ស្រស់បំព្រង នៃខេត្តព្រះសីហនុ ដែលត្រូវបានប្រសិទ្ធនាមថាជា តារារៈនាទិសនិរតី និងកំពុងបំពេញតួនាទីជាប៉ូលសេដ្ឋកិច្ចដ៏មានសារៈសំខាន់ និងជាខេត្តស្នូលនៃតំបន់ឆ្នេរសមុទ្រកម្ពុជា ក្នុងការជំរុញការអភិវឌ្ឍសង្គម និងសេដ្ឋកិច្ច ដោយមានការចូលរួមពីគ្រប់វិស័យពាក់ព័ន្ធ។ បានលើកឡើងថា សណ្ឋាគារត្រាយម៉ូលា បានរួមចំណែកយ៉ាងសំខាន់ក្នុងការជួយជំរុញ និងលើកកម្ពស់សេដ្ឋកិច្ចនៅក្នុងខេត្តព្រះសីហនុឱ្យកាន់តែទទួលបានភាពទាក់ទាញ និងរីកចម្រើនទៅមុខជាលំដាប់។
លោកអភិបាលរងខេត្ត បានបន្ថែមថា សណ្ឋាគារត្រាយម៉ូលា នេះបានផ្តល់ការងារជូនប្រជាពលរដ្ឋទាំងក្នុងខេត្តព្រះសីហនុ និងមកពីបណ្តាខេត្តផ្សេងៗ ដែលជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ប្រជាពលរដ្ឋស្របតាមគោលនយោបាយ និងយុទ្ធសាស្ត្របញ្ចកោណដំណាក់ទី១ របស់រាជរដ្ឋាភិបាលកម្ពុជាគឺដើម្បី កំណើន ការងារ សមធម៌ ប្រសិទ្ធភាព និងចីរភាព ដែលជាមូលដ្ឋានគ្រឹះឆ្ពោះទៅសម្រេចបាន ចក្ខុវិស័យកម្ពុជាឆ្នាំ២០៥០។
លោក សាមុត សុធារិទ្ធ បានគូសបញ្ជាក់ទៀតថាពិធីសម្ពោធនេះជាសក្ខីភាពថ្មីមួយទៀត ដែលបង្ហាញឱ្យឃើញពី ការជឿជាក់របស់អ្នកវិនិយោគមកលើរាជរដ្ឋាភិបាលកម្ពុជា ក្រោមការដឹកនាំ ដ៏ឈ្លាសវៃ ប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។ លោកអភិបាករងខេត្ត ក៏បានជូនពរឱ្យសណ្ឋាគារ ត្រាយម៉ូលា (TRIMULIA) ទទួលបានជោគជ័យ ក្នុងមុខជំនួញរបស់ខ្លួន និងមានការគាំទ្រកាន់តែច្រើនឡើង ពីសំណាក់ ភ្ញៀវជាតិ និងអន្តរជាតិផងដែរ។
សូមជម្រាបដែរថា សណ្ឋាគារត្រាយម៉ូលា គឺជាសណ្ឋាគារលំដាប់ខ្នាតអន្តរជាតិដែលធំជាងគេស្ថិតនៅចំកណ្តាលទីក្រុងព្រះសីហនុ ដែលងាយស្រួលសំរាប់ភ្ញៀវជាតិ និងអន្តរជាតិមកស្នាក់នៅ និងកំសាន្តនៅខេត្តព្រះសីហនុ បន្ទប់ស្នាក់នៅមានភាពស៊ីវិល័យ ប្រកបដោយផាសុខភាព មានអាងទឹកដ៏ស្រស់ស្អាត់នៅលេីលំហ ព្រមទាំងមាន Sky Bar ដ៏មានប្រណិតភាពដែលអាចអោយភ្ញៀវគយគន់ទេសភាព និងសម្រស់ឆេីតឆាយនៃទីក្រុងព្រះសីហនុបានគ្រប់ជ្រុងជ្រោយ ការបើកសម្ពោធសណ្ឋាគារនេះ នឹងរួមចំណែកក្នុងការអភិវឌ្ឍន៍ក្រុងព្រះសីហនុ កាន់តែមានសក្តានុពលក្នុង ទាក់ទាញវិនិយោគិននិងទេសចរណ៍ ប្រែក្លាយខេត្តនេះទៅជាតំបន់សេដ្ឋកិច្ចពិសេសគំរូពហុបំណង៕
ផ្សាយ:ថ្ងៃទី២៨ ខែកញ្ញា ឆ្នាំ២០២៥
ដោយ:និពន្ធនាយករងអង្គភាពអាស៊ានដេលីនិងជាប្រធានប្រចាំខេត្តព្រះសីហនុ.
សៅ វាសនា(HarryVS)
