ឯកឧត្តម ម៉ាង ស៊ីណេត អភិបាលខេត្តព្រះសីហនុ ផ្តាំផ្ញើដល់អភិបាលក្រុងកោះរ៉ុងថ្មីត្រូវខិតខំធ្វេីការ និងអភិវឌ្ឍន៍ក្នុងតំបន់អោយកាន់តែរីកចំរេីន និងមានភាពទាក់ទាញ.
(ខេត្តព្រះសីហនុ)៖ ពិធីប្រកាសតែងតាំងអភិបាលក្រុងកោះរ៉ុង ក្រោមអធិបតីភាពដ៏ខ្ពង់ខ្ពស់ ឯកឧត្តម ម៉ាង ស៊ីណេត អភិបាលខេត្តព្រះសីហនុ ដោយមានការអញ្ជេីញចូលរួមពីឯកឧត្តម លោកជំទាវ អភិបាលរងខេត្ត អភិបាលក្រុង ប្រធានមន្ទីរ មន្ត្រីរដ្ឋបាលខត្ត ភ្ញៀវជាតិ និងអន្តរជាតិ នាព្រឹកថ្ងៃទី៩ ខែកញ្ញា ឆ្នាំ២០២៥ ស្ថិតនៅក្រុងកោះរ៉ុង ខេត្តព្រះសីហនុ។
ឆ្លៀតក្នុងឱកាសនោះ ឯកឧត្តម ម៉ាង ស៊ីណេត បានមាន ប្រសាសន៍ផ្តាំផ្ញើដល់អភិបាលក្រុងកោះរ៉ុងគឺ លោក រាជ សុវណ្ណ ដែលទើបទទួលតំណែងថ្មីនាពេលនេះត្រូវបង្កើនការដឹកនាំក្រុងកោះរ៉ុងឲ្យមានការអភិវឌ្ឍន៍រីកចម្រើន ជួយសម្រួលពន្លឿនការងារនៅរដ្ឋបាល ថ្នាក់ក្រោមជាតិ ឱ្យកាន់តែល្អប្រសើរ ក្នុងការឆ្លើយតបបានទាន់ពេល វេលានូវសំណូមពរ និងតម្រូវការរបស់ប្រជាពលរដ្ឋនៅមូលដ្ឋានស្រប តាមគោលនយោបាយកែទម្រង់ស៊ីជម្រៅវិមជ្ឈការ និងវិសហមជ្ឈការ របស់រាជរដ្ឋាភិបាល ។
ក្នុងពិធីប្រកាសតែងតាំងលោក រាជ សុវណ្ណ ជាអភិបាល ក្រុងកោះរ៉ុងនេះគឺជំនួសតំណែងរបស់លោក នួន ប៊ុនថុល ដែលទៅទទួលតំណែងថ្មីជា អភិបាលក្រុងកំពង់សោម ក្នុងនោះក៏មានការប្រកាសតែងតាំង អភិបាលរងក្រុងកោះរ៉ុងផងដែរ តបតាមប្រកាសលេខ ៦៧៥អនក្រ.តត ស្តីពីការតែងតាំងឋានន្តរស័ក្តិមន្ត្រីរាជការ របស់ក្រសួងមហាផ្ទៃ ។
ឯកឧត្តម ម៉ាង ស៊ីណេត អភិបាលខេត្តព្រះសីហនុ បានធ្វើការណែនាំ ដល់គណៈបញ្ជាការឯកភាពក្រុង ត្រូវសហការជាមួយក្រសួង ស្ថាប័ន មន្ទីរអង្គភាពពាក់ព័ន្ធ ដើម្បីការពារនឹងទប់ស្កាត់ឱ្យបានជាដាច់ខាត រាល់ការកាប់បំផ្លាញ និងទន្ទ្រានកាន់កាប់ដីព្រៃខុសច្បាប់ ដូចនេះក្នុង នាមគណៈបញ្ជាការឯកភាពក្រុង ត្រូវគ្រប់គ្រង់ដីចំណីឆ្នេរឱ្យបានម៉ឺង ម៉ាត់តាមប្លង់គោល រាល់ការសាងសង់ត្រូវមានលិខិតអនុញ្ញាតឱ្យបាន ត្រឹមត្រូវ ហើយគណៈបញ្ជាការឯកភាពក្រុង ត្រូវសហការជាមួយដៃគូរ អភិវឌ្ឍន៍ក្នុងការរៀបចំសម្អាតបរិស្ថាន អនាម័យ និងសោភ័ណភាព តំបន់ឆ្នេរ ដើម្បីជំរុញការទាក់ទាញភ្ញៀវទេសចរឱ្យមកកម្សាន្តកាន់តែ
ច្រើន ជំរុញការអនុវត្តគោលនយោបាយ «ភូមិ ឃុំ សង្កាត់ មាន សុវត្ថិភាព» ។
ដូច្នេះគណៈបញ្ជាការភាពរដ្ឋបាលគ្រប់លំដាប់ថ្នាក់ ត្រូវពង្រឹងគ្រប់ គ្រងសភាពការណ៍តាមមូលដ្ឋាន ដើម្បីដាក់ចេញនូវវិធានការនានា សំដៅទប់ស្កាត់ឱ្យបានទាន់ពេលវេលានូវរាល់សកម្មភាពបទល្មើស និងការប៉ុនប៉ងបង្កភាពចលាចល ភាពវឹកវរ និងអសន្តិសុខសង្គម ចូលរួមការពារផលប្រយោជន៍សាធារណៈ ផលប្រយោជន៍សហគមន៍ រួមចំណែកក្នុងការទាក់ទាញទេសចរជាតិ អន្តរជាតិ និងអ្នក វិនិយោគមកកាន់តំបន់កោះ កាន់តែច្រើនបន្ថែមទៀតបង្កើនជីវភាព ដល់ប្រជាពលរដ្ឋ និងបង្កើនសេដ្ឋកិច្ចដល់សង្គម។
លោក រាជ សុវណ្ណ ដែលបានចូលកាន់មុខតំណែងជាអភិបាលក្រុង កោះរ៉ុង បានធ្វើការប្តេជ្ញាចិត្ត ក្នុងការបំពេញតួនាទីឲ្យបានល្អ ក្នុងការបម្រើ សេវាសាធារណៈជូនប្រជាពលរដ្ឋប្រកបដោយគុណភាព និងប្រសិទ្ធភាព តម្លាភាពពង្រីកកិច្ចសហការស្អិតរមួតជាមួយកងកម្លាំងប្រដាប់អាវុធ បណ្តា មន្ទីរ-អង្គភាពជំនាញពាក់ព័ន្ធនានាក្នុងក្រុងកោះរ៉ុង សំដៅកែប្រែ និងលើកស្ទួយជីវភាពរស់នៅ សុខមាលភាព សន្តិសុខ និងសុវត្ថិភាពជូនប្រជាពលរដ្ឋស្របតាមគោលនយោបាយ ភូមិ-ឃុំមានសុវត្ថិភាពទាំង៧ចំនុចរបស់រាជរដ្ឋាភិបាល អាណត្តិទី៧ នេះផងដែរ៕
ផ្សាយ:ថ្ងៃទី៩ ខែកញ្ញា ឆ្នាំ២០២៥
ដោយ:សៅ វាសនា
